عقبت سارة ياسين حفيدة الفنان المصري الراحل إسماعيل ياسين، على مشهد للفنان محمد رمضان مع شخص يجسد الفنان الراحل في مسلسل “موسى” الذي يعرض حاليًا في شهر رمضان.

وقالت سارة:” صحفيين كلمونا طالبين منا تعليق على مشهد في مسلسل اسمه موسى لمحمد رمضان وعشان أنا الصراحة مبتفرجش على أعماله مكنتش فاهمة إيه سبب كل الدوشة دي وإلحاحهم على تعليق أسرة إسماعيل ياسين، هو أيه علاقة إسماعيل ياسين بمسلسل محمد رمضان أصلاً! أحد الصحافيين صمم أنه يبعتلي المقطع وقالي كلمة ظهور سلبي وعشان برده أنا فاهمة أن طبع الصحافة المبالغة قولت نشوف ونحكم بأنفسنا قبل أي تعليق”.

وأشارت:”والصراحة طلع عندهم شوية حق لأن دي مش أول مرة محمد رمضان يجيب سيرة إسماعيل ياسين، بس أنا مش بلوم عليه، واحد تصرفاته بتثبت مشاكل نفسية أهمها عدم الثقة بالنفس والنقص اللي واضح أن الشهرة والفلوس مملوش عنده الحتة دي وطبعاً مش محتاجة أقول أيه الأسباب، أنا بلوم على المخرج والمصور والمنتج اللي مفروض أنهم ينتموا للفن”.

وتابعت:”أنا كمان بلوم على الولد اللي أدى الشخصية اللي صفحته على التيك توك كلها إعجاب وتقدير للفنان إسماعيل ياسين، دا حتى زار السويس اللي منها إسماعيل ياسين واتصور فيها، بس واضح إنه استغله للوصول للشهرة فقط لأنه لما جتله الفرصة للظهور في مسلسل؛ وافق علي تقديم مثله الأعلى بشكل غير لائق بس ليه هو مش لإسماعيل ياسين لأن ببساطة سيظل إسماعيل ياسين أيقونة الكوميديا في مصر والوطن العربي، الوحيد صاحب أعمال تُسمى بإسمه، ستظل سيرته الحميدة التي لم تمت حتى بعد 49 سنة من وفاته رغم كل من يحاول الإساءة له أو لتاريخه الفني”.