تقدمت زوجة مصرية بدعوى خلع ضد زوجها بإحدى محاكم الأسرة في القاهرة ، مؤكده ” استحاله أعيش معاه في بيت واحد .. سفرني دُبي واتجوز عليِ عرفي ” .

تقول الزوجة في تصريحات لإحدى الصحف المحلية ، اتجوزنا عن حب.. كنا بنشتغل سوا وقعدنا مرتبطين 3 سنين قبل الخطوبة وبعدها اتخطبنا سنة كونا نفسنا مع بعض، وصبرت عليه لحد ما اشترى شقة بالقسط وشطبناها وفرشناها وعملنا كل حاجة إيد بإيد.. طبعة شغلنا في العلاقات العامة والإعلانات صعب وبيخلي مواعيدنا مختلفة بس دايما كنت بصبر عليه وألم أمورنا عشان خاطر نكمل، وربنا أكرمني ببنتين وحياتنا كانت كويسة”.

وأضافت ، “من سنتين جالي عرض بالعمل في شركة في دبي بمرتب محترم.. في الأول مكنتش موافقة عشان بناتي وجوزي وأمي لكن لما هو عرف استغربت جدا من رد فعله، ولقيته بيقولي دي فرصة مش هتتعوض ورحب جدا.

وتابعت ، “علاقتنا بعد سفري بقت الماديات بس إني أحوله فلوس عشان البنات والأقساط وبس، لكن حسيت في الفترة الأخيرة إنه بقى بعيد عني وفي حاجة غريبة خصوصا لما والدتي قالتلي إنه مبقاش ييجي للبنات زي الأول ” .

فحبيت أعملهم مفاجئة وأنزل إجازة بعد حوالي سنة وشهر مكنتش قادرة استحمل بعدي عن البنات أكتر من كدا ، وكانت الصدمة لما استقبلني بفتور جدا وكأنه مخضوض، وبعد كام يوم لقيت رقم واحدة غريب عنده على (واتس آب) بتسأله مراتك هتمشي امتى!، غير المكالمات الكتير اللي بينهم ، فمشيت وراه مرة وهو خارج وراح على بيتها، وطلعت وعملتلهم فضيحة فقالي إنه متجوزها عرفي من كام شهر.. وطلبت الطلاق رفض فقررت الخلع وأخد بناتي ونسافر”.